Nafartarrak Kultur Taldeak Nabarralde Fundazioarekin elkarlanean, 2019an Usurbilen egindako “Tomas Zumalakarregi” eta bere garaia jardunaldien inguruko liburua argitaratu du. Bertan, jardunaldietako hitzaldiak biltzen dira. Nafartarrak Kultur Taldeko kideen esanetan, jardunaldi horiek izan zuten harrera ona ikusita liburua argitaratzea erabaki zuten. Orain, liburua herritarrei aurkeztuko diete.
Liburuaren aurkezpena
- Irailak 17, osteguna.
- 19:00etan.
- Potxoenean.
Sarrerak
Aurkezpenera joateko aurrez sarrerak (doan) eskuratu behar dira webgune honetan: usurbilkultura.eus webgunean.
Liburua
“Tomas Zumalakarregi, gure herrialdearen figura historiko nagusietako bat da, errelato ofizialaren hegemoniari ihes egitea lortu duen gutxienetako bat hain zuzen ere. Hala izan da behintzat herriaren iruditerian, gure herri, eskualde eta hiri askotan aurkitu daitezken kaleek erakusten diguten bezala. Zumalakarregi, bere biografia zehatzaz harago, bere garaiari lotutako gizon bat izan zen. Trantsizio garaia izan zen hura: Aro Zaharretik Aro Garaikidera, despotismo ilustratutik liberalismora. Napoleonen inbasioaren trauma gailenduta, Nafarroa, Araba, Gipuzkoa eta Bizkaiari euren jatorrizko ohitura eta legeak defendatzea egokitu zitzaien, eredu bakarreko kultura eta hizkuntzaren kontra.
Hala, Zumalakarregiren pertsonaiean sakontzeko, ezinbestekoa suertatuko da bere garaia eta testuinguru historikoa ezagutzera ematea. Horretarako, garai hartako testuinguru sozial, politiko eta ekonomikoa aztertzea izan dugu helburu: komunalen sistema, euskararen egoera, landa eremuko biztanleria, hirietako langileria… Azken finean, Zumalakarregi eta bere garaiaren inguruan ekarpenak egitean datza helburua, garai hartako liberalismoaren eta gaur egun luzatu den errelatoaren ikuspegitik harago”.
- Egileak: Patxi Zabaleta, Mikel Sorauren, Juantxo Madariaga, Xabier Irujo, Fernando Sanchez Aranaz, Idoia Arrieta eta Asisko Urmeneta.
- Argitalpenaren koordinazioa: Nafartarrak
- Argitaletxea: Nabarralde Fundazioa
- Orrialdeak: 112
Usurbil Eginez 